Adnodd yn cyhoeddi aelodau bwrdd newydd, Natalie Jones a Mair Gwynant
Croesawodd Adnodd ddwy aelod newydd i’n bwrdd yn ddiweddar: Natalie Jones a Mair Gwynant. Bydd eu harbenigedd a’u hymroddiad i addysg a llywodraethu yng Nghymru yn chwarae rhan allweddol wrth ddatblygu ein cenhadaeth i ddarparu adnoddau dwyieithog o ansawdd uchel ar gyfer y Cwricwlwm i Gymru.
Dysgwch fwy am Natalie a Mair isod a pham ein bod yn falch iawn eu bod nhw’n ymuno â ni:
Natalie Jones
Mae Natalie Jones yn hyrwyddwr angerddol dros addysg gynhwysol a bywiog. Gyda’i threftadaeth Jamaicaidd a’i chariad at y Gymraeg, mae Natalie wedi ymrwymo i wneud dysgu’n hygyrch ac ysbrydoledig i bawb. Yn ei rôl fel Rheolwr Addysg, Amrywiaeth a Chymraeg yn S4C, mae’n sicrhau bod cynnwys difyr yn cyrraedd plant a dysgwyr Cymraeg.
Wedi dysgu Cymraeg fel ail iaith, mae Natalie wedi gweithio ar draws ysgolion cynradd ac uwchradd, gan roi dealltwriaeth fanwl iddi o dirwedd addysgol Cymru. Mae ei mewnwelediad i ffocws y cwricwlwm newydd ar empathi a dealltwriaeth gymdeithasol yn cyd-fynd yn berffaith â nod Adnodd o greu adnoddau sy’n adlewyrchu profiadau amrywiol dysgwyr Cymraeg.
Y tu hwnt i’w rôl yn S4C, mae Natalie yn ysgrifennu i gylchgrawn Golwg ac yn ymgyrchydd dros gydraddoldeb gyda Chyngor Hil Cymru. Yn 2023, cafodd ei chydnabod am ei hymdrechion gyda gwobr am Gydraddoldeb a Chynhwysiant Hiliol, ac mae hi hefyd yn awdur plant cyhoeddedig. Mae ei hymroddiad i hyrwyddo amrywiaeth a gwrth-hiliaeth mewn ysgolion yn ategu gwerthoedd Adnodd, gan sicrhau bod ein hadnoddau yn adlewyrchu cyfoeth cymdeithas amlddiwylliannol Cymru.
Mair Gwynant
Rydym wrth ein bodd bod Mair Gwynant yn ymuno â ni fel Aelod o Fwrdd Adnodd a Chadeirydd y Pwyllgor Archwilio a Sicrwydd Risg. Gyda dros 30 mlynedd o brofiad ym maes cyllid, mae Mair yn arweinydd uchel ei pharch sy’n adnabyddus am ei ffocws ar werth am arian a llywodraethu da. Yn Gymrawd o Sefydliad y Cyfrifwyr Siartredig, mae wedi dal swyddi proffil uchel gyda Deloitte a Llywodraeth Cymru.
Trwy ei busnes ymgynghorol, mae Mair wedi cefnogi elusennau a mentrau cymdeithasol gyda rheolaeth ariannol. Mae hi hefyd yn cadeirio’r Pwyllgorau Archwilio a Risg ar gyfer Comisiynydd y Gymraeg a Chomisiynydd Cenedlaethau’r Dyfodol. Mae ymrwymiad Mair i lywodraethu da yn gweddu’n berffaith i weledigaeth Adnodd o werth cynaliadwy mewn addysg.
Mae Mair hefyd yn wirfoddolwr gweithgar yng Nghanolfan Mileniwm Cymru. Mae ei chyfuniad o arbenigedd ariannol ac ymglymiad cymunedol yn ei gwneud yn ychwanegiad amhrisiadwy i’n tîm, gan sicrhau bod ein hadnoddau’n cael eu darparu’n effeithlon a chyda’r safonau llywodraethu uchaf.
Cwrdd â gweddill y tîm