Beth am helpu i lywio dyfodol adnoddau addysgol yng Nghymru?

Mae Adnodd ar daith gyffrous iawn. Ac rydyn ni’n chwilio am unigolion brwd i ymuno â ni. 

Ers ein sefydlu yn 2023, rydyn ni wedi bod yn datblygu sefydliad cenedlaethol sy’n cefnogi dysgwyr, ymarferwyr a chymunedau ledled Cymru drwy sicrhau bod pawb yn gallu defnyddio adnoddau addysgol o ansawdd da, a hynny yn Gymraeg ac yn Saesneg. 

Wrth i ni gamu i’r cyfnod nesaf yn ein datblygiad, rydyn ni’n chwilio am aelodau newydd i ymuno â’n Bwrdd ac i’n helpu i ddylanwadu ar ddyfodol addysg yng Nghymru. 

Efallai dy fod eisoes yn aelod Bwrdd profiadol, neu’n awyddus i gyfrannu dy arbenigedd at wasanaeth cyhoeddus am y tro cyntaf; y naill ffordd neu’r llall, rydyn ni’n awyddus i glywed gan bobl sy’n rhannu ein hymrwymiad i gydweithio, arloesi a gwneud gwahaniaeth ar ran dysgwyr. 

Gair gan ein harweinwyr:

Mae rhagor o wybodaeth am ein gwaith i’w gweld yn ein strategaeth ar gyfer 2025-2028 

Pam ymuno ag Adnodd? 

Drwy ddod yn aelod o’r Bwrdd, bydd cyfle i ti wneud y canlynol: 

• Helpu i ddylanwadu ar gyfeiriad strategol sefydliad cenedlaethol sy’n tyfu, a hynny ar adeg hynod o bwysig yn ei ddatblygiad. 

• Cyfrannu dy arbenigedd a dy brofiad at wasanaethau cyhoeddus, gan helpu i gryfhau ein trefniadau llywodraethu, hybu arloesi, a gwella ein prosesau gwneud penderfyniadau. 

• Gweithio gyda phartneriaid, rhanddeiliaid a chydweithwyr brwd o bob cwr o Gymru sydd wedi ymrwymo i wella addysg i genedlaethau’r dyfodol. 

• Gwneud cyfraniad o bwys at hybu addysg ddwyieithog a’r gwaith i roi’r Cwricwlwm i Gymru ar waith. 

• Helpu i wella sut bydd dysgwyr ledled Cymru yn cael gafael ar adnoddau addysgol o ansawdd da, gan sicrhau bod plant a phobl ifanc yn gallu elwa o brofiadau dysgu difyr, perthnasol a chynhwysol.